Teks Pidarta "Ngrajegang Seni Budaya Bali Malarapan Pesta Kesenian bali".

OM SWASTIASTU

Kaping ajeng, suksma aturang titiang majeng ring ugrawakia, duaning sampun micayang galah ring Padewekan titiang.

Majeng ring para panuriksa sané singgihang titiang,

Ida dane para semeton pemilet  pidarta basa Bali  sane tresna sihin titiang.

Angayubagia aturuningang titiang majeng ring Ida Sang Hyang Widhi Wasa, duaning malarapan sih asung kerta wara nugrahan Ida Sang Hyang Widhi, mawinan titiang pingkalih ida-dané sida mangguh karahajengan, sida mapadu wedana ring rahinané mangkin. Gargita dahat manah titiang riantuk kaicénin galah matur amatra,nganinin indik murdan pidartan titiang mamurda ,“ Ngrajegang Seni Budaya Bali Malarapan  Pesta Kesenian Bali ”.

Inggih Ida-dane sarengsami sane wangiang titiang

            Pesta Kesenian Bali sampun kamargiang ngawit warsa 1978 lintang, sangkaning pikamkam ida Profesor Doktor Ida Bagus Mantra, sane sampun newata daweg ida mandeg Gubernur Bali. Wit punika Pesta Kesenian Baline kamargiang nyabran warsa. Yening wilangin sane mangkin sampun kalaksanayang kantos ping tigang dasa pitu. Tetujon Pesta Kesenian Bali dahat mautama kanggen sarana nglestariang, ngwerdiang miwah ngelimbakang seni budaya baline, duaning seni budaya pinaka silih tunggil piranti ngrajegang jagat Bali.  Sampun kauningin sareng sami, mungguing kawentenan jagat Baline wiakti sampun kaloktah kantos kaduranegara indik adat miwah seni-budaya sane kantun rajeg kantos mangkin sane kadasarin antuk Agama Hindu.

            Sajeroning netenin linggih jagat baline sane nginggilang seni budaya, patut pikayunin sareng sami mangda setata ngwerdiang kesenian-kesenian sane katamiang olih para leluhure nguni.Yening dados tunas,sampunang kantos kesenian sane wenten ring desha-desha ring sejebag jagat Bali wenten sane punah. Napi malih ring aab jagat  sane sampun awor kadi mangkin, panglimbak budaya sane kaon saking duranegara mangda prasida katepasin. Ngrajegang seni budaya Bali sekadi seni sastra, seni tari,seni tabuh, seni rupa,seni padalangan, miwah seni sane tiosan wantah parilaksana sane dahat utama santukan makeh pisan piteket utawi tuntunan sane sida kapangggih mangda iraga sareng sami sida maparilaksana rahayu ring jagate.

            Sane mangkin sampun makeh seni budaya Baline keni pikobet miwah panglimbak sane nenten becik, luirnyane kawentenan seni sakral utawi bebali sane sampun mauwah dados seni komersial utawi balih-balihan sane tetujonnyane wantah molihang arta brana. Ring kawentenan basa miwah sastra Bali taler asapunika. Makeh parajana Bali mangkin nenten uning mabasa Bali, nenten eling malih ring gegendingan Bali, napimalih jagi nembangang pupuh,kidung miwah kakawin. Punika sami pacang mawesana kaon, prasida ngawinang taksun seni budaya baline sayan-sayan rered. Kawentenanne kadi asapunika mangda patut digelis ketepasin mangda seni budaya baline setata ajeg lestari.

Sapasire ke sane patut ngelestariang budaya Baline?wantah iraga, iraga sareng sami sane patut nglestariang seni budaya Baline. Inggih alit-alit miwah para anom-anome sami, ngiring telebang malajahin seni saking alitmangda ri sampunne anom tur duur prasida nyihnayang kawagedan seni anggen piranti nglestariang miwah ngelimbakang seni budaya Baline. Seni budaya Baline nenten sida kapasahang ring kawentenan jagat miwah parajana Baline sane kantos mangkin kantun  kukuh ngamargiang swagina ring bagaian pertanian, nginggilang dharma pamaculan. Kawentenan subak pinaka silih tunggil warisan budaya sampun macihna, parajana Bali taler ngamargiang indike punika ngawinang pidabdab kerta masa utawi “pola tanam” ri kala makarya ring bangkete kantos mangkin mamargi becik. Saking kertamasane mamargi becik kapungkur wekas,  parajana Baline sida mangguh kerta masa, masa sane kerta, gemah ripah lohjinawi, “menuju kesejahtraan semesta”. Yening sampun masane kerta, pidabdab nglestariang miwah nglimbakang seni budaya Bali pastika sayan nincap ngawinang seni budaya Baline sayan mataksu. Seni nenten mataksu waluya raga tanpa jiwa.

Ida-dane sareng sami sane wang titiang

            Utsaha sane sampun kamargiang antuk nayakaraja utawi guru wisesa ringBali mangda prasida nincapang kawentenan keseniane punika sampun kacihnayang ring Pesta Kesenian  Baline.Elingang Pesta kesenian baline punika boya ja druen nayaka praja kewanten pangremba karya kewanten. Pesta Kesenian Bali Baline wantah druen iraga sareng sami.  Punika mawinan sareng sami patut mikayunin miwah ngremba mangda pamargin pesta kesenian Baline sayan mecikang ka pungkur wekas santukan kantun wenten pakrimik wargi sane maosang pamargin pesta kesenian baline sekadi pasar malam, wenten taler ngamaosang pamargine sampun sayan ngwanehin, kadi mangkine kabaos monoton. Mapaiketan ring indike punika, wenten amatra sane sida aturang titiang pinaka jagra winungu, waluya padewekan titiange sakadi nasikin segara. Banget pinunas titiang, ring genah pesta kesenian Bali kalaksanayang, irika ring Taman Budaya, mangda sane kapamerang yukti-yukti karya seni linuih. Sampunang mamerang barang-barang sane nenten mapaiketan ring indik seni budaya. Mangda nenten kaboas monoton, Tim curator sane nureksa kesenian sane kapamerang miwah kasolahang ring pesta kesenian Bali mangda yukti-yukti milih tur nitenin kesenian sane becik miwah sane arang polih masolah ring pesta kesenian Balinne. Yening sampun seniman utawi sekaa kesenian sane masolah nyabran warsa matiosan  sinah-sesolahanyane nenten pacang ngwanehin. Icenin galh para senimanne tiosan mangda polih nyihnayang kawagedannyane ring sajeroning seni soang-soang. Dumugi sangkaning sami pada polih nyihnayang kawagedannyane,para senimanne egar  raris nuntun para yowanane mangda sayan oneng malajah masolah, nabuh,nyastra, miwah malajahin seni budaya Bali sane tiosan.

            Ingih Ida-dane sareng sami, punika mawinan titian purung nguningayang atur, Pesta Kesenian Baline wantah silih tunggil piranti anggen ngrajegang seni budaya Bali. Yening sampun seni budaya Baline rajeg, napi malih ring masane sampun nincap ring kerta  masa, pastika sampun taksun  seni miwah jagat Baline sayan dumilah mangda sukanikang rat.

Inggih, Ida-dane sareng sami, uytamannyane para yohana sane kusumayang titiang.

   Sane mangkin cutetang titiang daging pidartan titiang puniki:

1.   Yening sampun masane kerta pastika pidabdab nglestariang miwah ngelimbakang seni budaya Bali pastika sayan nincap ngawi seni budaya Baline sayan mataksu.

2.   Pesta kesenian bali silih tunggil piranti anggen ngrajegang seni Budaya Bali. Yening sampun seni budaya Baline ajeg pastika taksun jagat baline sayan dumilah.

      Sadurung titiang puputang pidarta puniki, idayang piragiang miwah kayunin tembang puniki:

 NGIRING SARENG-SARENG

JAGA LAN LESTARIANG

NGIRING SARENG-SARENG

NGRAJEGANG SENI LAN BUDAYA

      Inggih,asapunika titiang prasida maatur-atur ring galahé sané becik puniki. Matur suksma majeng ring uratian idadané, menawi wénten basa basitha nénten  manut ring manah soang-soang, lugrahang titiang nunas geng rena sinampura. Maka wasananing atur, puput titiang antuk paramasantih.

OM SANTIH SANTIH SANTIH OM