DRAMA BALI

1.1  Pengertian

Drama inggih ipun susastra sane marupa sasolahan, tingkah laku ngundukang pratingkah manusa, tur nganggen basa anggena matutur-tuturan. Drama Bali inggih ipun drama sane nganggen basa Bali, anggena nekedang reraosan. Drama mateges lelampahan, paigelan, sandiwara. Drama Bali wenten 2 soroh, inggih punika:

1.1.1    Drama Bali Tradisional

Drama puniki taler kaparinama drama Bali klasik marupa soroh drama (lelampahan) sane nyatuang indik satua puri (istana), aab gumine sane ilu, tur nganggen gong, gagendingan, miwah busana Bali (kamben, udeng, keris, senteng, saput, msl).

Ciri (cihna) lelampahan drama Bali purwa puniki :

a.  Lelintihan satuane nenten nganggen sesuratan (naskah drama)

b.  Nenten wenten sutradara,

c.  Nganggen gamelan (gong, angklung( anggena ngrameang lelintihan lelampahan,

d. Madasar antuk igel-igelan (tanjek gong),

e.  Madgaing gagendingan (tembang),

f.  Nganggen rangki, stromking ring kalangane,

g.  Unteng satuane nyatuang soroh puri (istana), wayang, babad, parwa, msl,

h.  Nganggen sarana topeng miwah busana Bali,

i.   Ang pragina dados mareraosan ring para penonton (sang ngaksi).

Conto :

1.    Arja :      a. Arja Pakangraras

b. Arja Cupak Grantang

c. Arja Pajang-Mataram

2.    Gambuh: a. Gambuh Raja Lasem,

b. Gambuh Dalem Bungkut,

c. Gambuh Dalem Dimade

3.    Wayang Wong:

a. Ghatotkasa Sraya,

b. Prabu Salya,

c. Sang Prabu Parikesit

4.    Prembon: a. Prembon Mayadanawa

b. Prembon Utusan Patih Ularan

c. Prembon Puputan Badung

5.    Sendratari:

a. Ramayana

b. Kresna Duta

c. Wirata Parwa

Di Bali soroh arja, gambuh, prembon akehan masesolahan nganggen topeng. Soroh topeng Bali punika wenten 3 soroh, sekadi :

a.    Topeng Panca

Sekaa igel sane madue pragina wantah lalima nanging mangkin sampun wenten topeng Sapta sane pragina pepitu. Upama : Topeng ring Batuan, Blahbatuh, Singapadu, msl.

b.    Topeng Pajegan

Topeng sane pidagingane nyaritayang indik sejarah topeng ring Bali. Topeng puniki nyaritayang indik agama. Upami : Topeng Sidakarya, Topeng Wali.

c.    Topeng Prembon

Prembon utawi drama tari topeng puniki taler kaparinama arja. Arja embas warsa 1940 ring Badung karintis olih wayan Geria sareng I Made Kredek. Praginane : Dalem, Galuh, MAntri, Desak, Penasar (Punta Kertala, msl).

1.1.2    Darma Bali Modern

Drama Bali Modern (anyar) utawi sandiwara marupa soroh drama (lelampahan) sane nyatuang indik idep sane mangkin. Idepe kadi mangkin puniki wenten sane masesolahan indik sakancan ring jeroan kulawarga banjar, masyarakat, miwah indik KUD, transmigrasi, keluarga berencana (KB) utawi anak matungkasan miwah, mademenan (cinta kasih). Drama Bali modern puniki matiosan (mabinaan) pesan ring drama Bali tradisional (klasik). Binan Drama Bali tradisional sareng drama Bali Anyar (modern) makeh pesan.

Cihne (ciri) drama Bali modern puniki inggih ipun :

a.    Lelintihan satuane nganggen naskah (sesuratan, sewala patra)

b.    Nganggen sutradara

c.    Nenten nganggen gamelan, nanging nganggen iringan musik (instrumentalia)

d.   Tetindakane madasar sakadi polahe sujati (kenyataan), nenten madasar tanjek gong

e.    Nganggen tutur (dialog) sakadi anak mareraosan ring polahe sujati (kenyataan)

f.    Nganggen dekor (papayasan panggung manut kadi sekala) (realistis) utawi caciren (absurd)

g.    Nganggen lampu mawarna warni (tata sinar)

h.    Unteng satuane nyatuang soroh idepe sakadi mangkin (sedih, liang, makasih-kasihan)

i.     Nganggen busana sekadi sakala (realitas)

j.     Sang pragina kaparinama : peran tokoh, pemain tur tan dados mangraos ring para panonton (sang ngaksi)

Ring Bali perkumpulan drama Bali modern kaparinama teater. Utawi sanggar. Soroh teater sane wenten, inggih ipun :

1.    Magenah ring Singaraja

1. Sanggar Bahtera
2. Sanggar Bukit Manis
3. Sanggar Citra
4. Sanggar Bale Agung
5. Sanggar Embun pagi
6. Sanggar Bale Bengong

2.    Magenah ring Badung

1. Sanggat Putih
2. Sanggar Nyuh Gading
3. Sanggar Minum Kopi
4. Sanggar Kukuruyuk
5. Teater Mini Badung

3.    Magenah Ring Gianyar

1. Sanggar Malini

Conto karya Drama bali Modern :

1.    Gede Dharma :  a. Kobaran Apine

b. Aduh Dewa Ratu

c. Ki Bayan Suling

2.    Ketut Aryana :  Nang Kepod

3.    Putu arya Semadi : Palakarma

Wenten malih soroh drama gong sane marupa drama Bali Tradisional (kasik) nanging madaging tur nganggen sarana modern. Drama gong puniki kasub pesan ring Bali duk warsa 1960 awinan, TVRI, miwah ring genahe lianan.

Upama : Drama gong sanggalangit (Buleleng)

Drama gong Banyuning (Buleleng)

Drama gong Bhara Kartika Budaya (Badung)

Drama Gong Abianbase (Gianyar)

1.2  Srana Sane Ngwangun Drama

Soroh srana ngwangun drama mangda prasida masesolahan becik, inggih ipun :

1.2.1    Sutradara

Sutradara dados marupa panguruk, pelatih, pacang ngrerehang satua, pemain (pragina), miwah nglatih, nyantos prasida mlelampahan tur nentuang akuda pacang polih jinah upah-upahne punika.

1.2.2    Pemain (Pragina)

Pragina utawi pemain drama puniki wenten 3 soroh, tur nyihnayang watak, agem, solah.

1)   Pemain Inti : pemain sane pinih penting pesan sane nentuang lelintihan satuane.

2)   Pemain Utama : pemain sane penting pesan nanging marupa musuh saking pemain inti, yening wenten pasiatan, raraosan

3)   Pemain pelengkap utawi pendukung: pemain sane marupa nglengkapin, ngrentebin, nyarengin pemargin satua

1.2.3    Satua (Naskah Satua)

Satua patut pesan becik mangda sang nyingak (penonton) kengin nonton nyantos puput. Antuk punika satuane mangda nganutin:

1)   Lelintihan satua sane becik upami : madaging pangawit satua, pasiatan puncak satua (klimas) pamuput satua

2)   Madaging unteng satua, upami: wenten pabesen sane pacang katekedang ring masyarakat utawi sang nyingak (penonton)

3)   Madue pemain (pragina) sane ngungguhang agem, watak, solah miwah pratingkah sane patut (cocok)

1.2.4    Genah (Bloking)

Yening sampun masesolahan, sang pragina mangda prasida ngatur genahne ngadeg, genahne mlinggih. Ring base Indonesia indik puniki kaparinama panempatan pemain (bloking). Sang pemain mangda ngatur genah mlelampahan mangda becik kacingak ri kala masesolahan drama.

1.2.5    Panggung

Genah masesolahan punika patut pesan kaprehatiang. Masesolahan ring Bale Banjar, ring alun-alun, ring gedung bioskop miwah ring radio (RRI) utawi ring Teve (TVRI) Malian-lianan pesan. Panggung genah masesolahan patut pesan karunguang, mangda cocok pepayasanipune (Dekorasi).

1.2.6    Sang Nyingak (Penonton)

Sane nyingak (penonton) patut pesan kaprehatiang, mangda sesolahan dramane lantur pamargine. Antuk punika indik reraosan (dialog) unteng satua, patut pesan wenten kacocokan ring para penonton miwah sane masesolahan.

1.2.7    Tata Suara

Tata suara sane marupa srana anggena mareraosan, sakadi mikropon miwah tutur reraosan mangda kapireng olih sang nyingak patut pesan karunguang. Iringan gong utawi musik mangda patut karunguang tur adung (cocok).

1.2.8    Tata Lampu

Mangda pamargin sesolahan dramane punika becik tur nglanggenin patut pesan indik tata sinar karunguang.

1.2.9    Pepayasan Panggung (Dekorasi)

Panggunge mangda kapayasin nganutin isian satua.

1.3  Latihan

Mangda lelampahan sesolahan dramane becik patut pesan wenten latihan-latihan. Latihan punika dados marupa:

a.    Latihan nrawang (latihan imajinasi)

b.    Latihan mandingang (latihan asosiasi)

c.    Latihan masolah (latihan berpose/berakting)

d.   Latihan magenah (bloking/penempatan ruangan)

e.    Latihan tindak (latihan merespon)

Indayang mangkin makarya sesolahan nganutin latihan-latihane sakadi manut ring baduur. Wus punika lantas latih sesolahan dramane ring sor puniki :

1.3.1    Tehnik Latihan

Mangda beik lelampahane patut pesan wenten penyusunan latihan, minakadi: ngungguhang genah latihan, dina napi latihan, mangda sami pemain (pragina) rauh, mangda kaperluan sami sane pacang mange sampun kawentenang miwah ngraosang parindikan satuane (naskah) sane pacang kalampahang.

Antuk punika patut pesan wenten latihan sane nganutin kadi puniki.

a.    Latihan I :

-      Latihan ngwacen satua (naskah) mangda para pemain (pragina) uning indik tokoh sane pacang kaigelang (kasolahang)

-      Mangda para pemain uning ring lelintihan satua dramane punika

-      Latihan ngwacen ring tengahing ati miwah ngwacen anggen suara keras

b.    Latihan II :

-      Latihan ngwacen nganutin watak solah, sang masolah.

Upami : mangraos nganutin panes (tekanan) mangraos nganutin solah/unduk gedeg galak, sedih, bangras msl. mangraos nganutin tabuh (logat) sane patut.

-      Latihan ngwacen miwah mangraos mangda cocok sekadi sadina nanging marupa madrama-drama

c.    Latihan III

-      Latihan mangraos lancer, becik, miwah anut sahaning drama

d.   Latihan IV

-      Latihan mangraos nanging madaging gerak-gerik (tindakan). Bacane during ngafalang bacaan

e.    Latihan V

-      Latihan mangraos nanging nenten nganggen nanskah (ngafalang satua)

-      Latihan nganggen gerak-gerik, nganutin satua (naskah) drama

-      Latihan malinggih utawi ngatur genah kalangan (penempatan posisi ruangan)

f.    Latihan VI

-      Latihan nganggen busana kadi mungguh ring satua (naskah) upami: general repetisi

-      Wus puniki raris masesolahan ring tengahing panggung (bale banjar, miwah kalangane lian)

g.    Masolahan miwah malelampahan drama