DARMAWACANA MABASA BALI

BALI WISATA BUDAYA KAPIKUKUHANG ATUK TRI HITA KARANA

Para Darsika miwah uleman sane wangiang titiang,

Taler para Ida dane utawi semton pamilet sane sihin titiang,

Om Swastyastu,

Angayubagia uningayang titiang majeng ring Ida Sang Hyang Widhi Wasa, saantukan wantah sangkaning asung kertha wara nugraha Ida, mawinan iraga prasida kacunduk masadu arep sakadi mangkin ring galahe sane becik puniki. Ampure ping banget lungsurin titiang ring Ida dane sinamian riantuk tambet titiange kalintang, nanging purun nglangkungin linggih Ida dane pacang maatur-atur samatra nganinin Indik ” Bali Wisata Budaya Kapikukuhang atuk Tri Hita Karana”.

Ida-dane Pamiarsa sane kasumayang titiang,

Ida dane sareng sami sayukti pisan sekadi mangkin, sami sampun uning rumasa ring kawentenan kauripane pamekas iriki ring Bali sayan sukerta, sangkaning pidabdab duene sareng sami sane marupa wewangunan sekala molihing don. Inggih punika kasidan mapikolih. Mungguing bhoga, upabhoga, lan paribhoga sami sampun sapatuta. Sarana makadi margi, listrik genah malajah marupa sekolah, pasar, bale banjar, miwah sane lienan sampun wenten kadi babuatane. Punika sami silih sinunggil sangkaning panglimbak wisata budaya sane mapikolih. Lian ring punika, taler mapikolih ring utsaha nyujur karahayuan jagat. Satata ngulati, ngastiti mangdawaras, seger pinaka bekel nglaksanayang swadarmane, ngulati nitenin mangda briak-briuk makrama.

Sakadi sane ketah kauningin, kantos mangkin Pulau Bali kantun kaangken pinaka “Pulau Seni Budaya, Pulau Dewata, Pulau Kahyangan, Pulau Seribu Pura miwah Pulau Sorga utawi The Last Paradise”. Sajaba punika Bali kabaos pinaka daerah tatujon wisata Indonesia Bagian Tengah. Sajeroning nitenin linggihe pinaka daerah tatujon wisata, Bali ngemanggehang Pariwisata Budaya pinaka daya tarik wisatawane sane pinih utama. Duaning asapunika, budaya Baline patut kaupapira mangda prasida ajeg, kukuh miwah lestari. Yening budaya Bali ne sampun rered utawi runtuh, pariwisata Baline pacang taler sayan rered tur padem, mawinan pawangunan ring Bali nenten pacang prasida mamargi antar.

Sane mangkin, ngiring baosang, asapunapi tata carane mangda budaya Bali ne prasida ajeg kantos kapungkur wekas? Para jana Bali ne saking dumun sampun kaloktah pinaka masyarakat gotong royong, nginggilang rasa sagilik-saguluk salunglung sabayantaka sarpanaya utawi ngelarang kesatuan miwah persatuan mangda prasida ngemolihang kasukertan. Dasar kahuripan puniki raris kemargiang antuk:

1. Mikukuhang tur ngrajegang Sang Hyang Agama Puniki manut ring pengamalan Sila Ketuhanan Yang Maha Esa

2. Nginggilang tata prawertining Maagama Hindu Tegesnyane ring ngelimbakang seni budaya Bali patut kadasarin antuk sasunduk miwah tata sulur agama.

3. Ngrajegang Tata sukertaning desa saha pawongannyane sekala lan niskala. Puniki mepiteges mangda sareng sami mamiara tata sukerta utawi keamanan desa antuk ngemargiang daging awig-awig Desa Pakraman sekala miwah niskala.

4. Nincapang Pangweruh, Kasusilan, miwah Pangupajiwa.Tegesnyane nenten surud-surud melajahang rage, nelebang daging sastra agama miwah teknologi maka bekel kahuripan anggen ngerereh pangupajiwa.

Ida-dane, sane wangiang titiang,

Ritatkala nglimbakang wewangunan pariwisata punika manut dudonan pangrencana, mangda kapikukuhan antuk Tri Hita Karana : tetiga pidabdab sane prasida ngametuang tatiga karahayuan jagat, inggih punika : Parahyangan, Pawongan, lan Palemahan. Parhyangan punika genah suci umat Hindu mangda janten-janten kasuciang olih pngepon pariwisatane, nenten cemer tur nenten sayan rusak. Pawongan, wong Bali sane neunang tur ngraksa pariwisata mangda sareng ngawerdiang, sareng midabdab sahanan genah utawi tetujon wisatene mangda asri pamekas taler ring budaya Baline. Indik palemahan, janten wenten karang suwung, karang palemahan sane katandurin antuk wit-wit taru sane mapikenoh sajeroning kahuripan. Mangda nenten sami kagentosin antuk wewangunan beton, hotel, cottage, saha pirantin ipun. Wewangunan kasidan magda kaanutang ring sejeroning pidabdab lan pangrencana sane sampun kasungkemin olih para jana Baline, sajeroning peraturan daerah lan awig-awig desa adat.

Nyarca indik pidabdab, pikeneh lan puaran wewangunan parwisata : tetojon lan genah wisata ring Bali wiakti makueh pisan babutan lanparantinyane. Sakewaten titiang nguningayang I wawu wantah akidik pinaka jalaran anggen pinget gumantingulati pamargi sane becik taler anggen pidabdab, anggen nincapang wewangunan pariwisata, kebudayaan lan kesenian Baline kapungkur wekas sayan becik. Mogi-mogi rasabakti, sutindih paramabela ring wangsa, desa lan negara sayan-sayan nincap

Sajaba punika, utsaha ngajegang seni miwah budaya Bali ketah kadasarin antuk dasar panglimbakan pawangunan adat Bali ne, warisan leluhur sane pinih utama sane kawastanin ajahan “Tri Hita Karana” minakadi Parahyangan, Pawongan,miwah Palemahan.

1. Parahyangan, meteges ngutamayang pawangunan sekala niskala taler nangun “hubungan” sane harmonis, medasar antuk manah suci majeng ring Ida Sag Hyang Widhi Wasa. Conto nyane inggih punika, melajahang rage, rajin metirtha yatra, mecikang genah-genah suci/Pura. Mangda polih pasuecan ring Ida Hyang Parama Kawi.

2. Pawongan, mateges nglimbakang tatakramaning kahuripan kemanusan minakadi ngwangun, ngelaksanayang sekancan parilaksana sane becik majeng ring semeton manusa sami. Puniki dasar nyane wantah Tri Kaya Parisudha, Kayika, Wacika, Manacika Parisudha. Berfikir, Berkata dan berbuat yang baik.

3. Palemahan, tegesnyane, mautsaha mamiara alam lingkungan gumanti prasida ngemolihang kahuripan sane trepti miwah kerta raharja. Sekadi ngelaksanayang upacara Tumpek Bubuh/Wariga, nanem pohon penghijauan, nanem mangrove, miwah sane tiosan.

Ida dane miwah semeton sami sane banget mustikayang titiang,

Kadi asapunika titiang prasida maatur-atur ring galahe sane becik puniki. Matur suksme banget antuk uratian Ida-dane sinamian. Menawi ta wenten iwang atur titian ten manut ring arsan Idadane, lugrayang titiang ngelungsur geng rena pengampura. Pinaka pamuput atur, sineb titiang antuk Parama Shanti,

OM Shanti Shanti Shanti OM.

 (2)

“Desa Pakraman Pinaka Sengker Ngawetuang Baline Ajeg”.

Om Swastyastu

Maka purwakaning atur titiang, pinih ajeng mantuka ring ida dane sareng sami, mustikanyane pisan Angga Juri sane kusumayang titiang. Maduluran antuk manah lascarya, lugrayang titiang ngaturang puja pangastuti ring Ida Hyang Parama Kawi, riantukan sangkaning asung kertha wara nugrahan Ida, titiang asapunika taler ida dane sareng sami, sida kasidan mapupul iriki, gumantin ipun ngamiletin pamargi pacentokan pidarta basa Bali, mapaiketan ring pekan seni remaja Kabupaten Badung warsane mangkin. Dumadak wekasan pamargi asapuniki sayan limbak kawentenannyane wastu sida ngawetuang jagat Baline ajeg.

Ida dane sareng sami mustikan nyane para pamilet sane wangiang titiang, ring galah sane becik puniki atur pidartan  titiang mamurda “Desa Pakraman Pinaka Sengker Ngawetuang Baline Ajeg”.

Ida dane sareng sami

Bali sampun kasub kawentenannyane ring dura nagara, sane sering kabaosang “Paradise Island” taler wenten sane maosang Bali punika “Morning Of The Word”. Bali kabaosang sekadi asapunika riantukan kaasrian lan kaluihan Adat lan Budayannyane sane ngangobin tur ngulangunin.

Midartayang indik ajeg Bali, punika merupa pabuat sane dahat mautama pisan. Riantukan pawangun jagat Baline kapungkur wekas, tan lempas ring swadharma sane mapiranti antuk pikukuh Tri Hita Karana, sane kajiwa-pramanin antuk sastra agama Hindu. Puniki sida werdi tur limbak, majanten sangkaning kawentenan adat lan budaya Baline sane mentik ring Desa-desa Pakramane.

Tri Hita Karana inggih punika marupa serana nyujur karahayuan urip, sanatana dharma, wastu sida moksatam jagad hita, malarapan antuk subhakti ring Ida Hyang Parama Kawi, paras paros ring sesamen manusa miwah tresna asih ring sarwa mauripe. Sami puniki mangda kadasarin antuk Tri Kaya Parisuda, saha kaetang maduluran antuk Catur Marga. Duaning asapunika, sandang pisan telebang anggen geguat lan sepat siku-siku pamatut nitenin urip maka krama Bali, bilih-bilih ring panglimbak aab jagate mangkin, yan irgamayang titiang, tan bina luir segara tan patepi, capuh awor tan pawates.

Agama Hindu, Adat lan Budaya Bali, punika sampun majanten madue paiketan. Kabaosang sakadi asapunika riantukan tatwa-tatwa Agama Hindu sane marupa pupulan tatwa luhur lan suci, punika sane ngurip, sane kaanggen sepat siku-siku ritatkala malaksana olih para karma Baline. Tata cara sane kadasarin antuk tatwa Agama Hindu, sane kalaksanayang punika kabaosang Adat Bali. Selantur nyane,  Adat punika limbak ring soang-soang Desa Pakraman, sane masikian sareng seni Budaya Bali sane ngawetuang Desa Mawa Cara.  Cutetnyane, Agama Hindu , Adat lan Budaya Bali  punika tan dados pasah utawi palas. Napi mawian? Riantukan maka sami punika patut masikian mangda prasida mamargi antar. Agama Hindu sane ngurip Adat lan Budaya Bali sane nglimbak ring soang-soang Desa Pakraman pinaka sengker sane patut kaupapira kalestarian nyane. Desa pakraman inggih punika pupulan krama sane madue hukum adat ring Bali nganutin tatwa Agama Hindu, sane mapaiketan ring Kahyangan Tiga. Swadharmaning soang-soang Desa Pakraman sane wenten ring Bali inggih punika :

1. Ngaryanang awig-awig

2. Mikukuhin dharmaning agama

3. Nglimbakang budaya Bali kadasarin antuk paras-paros, saglilik-sagluluk, salunglung-sabayantaka.

4. Sareng – sareng ngalaksanayang pawangunan mangda sida jagat Baline  landuh, gemah ripah loh jinawi, tata tentrem kerta raharja sakala-niskala, sane kabasos moksatam jagat hita ya ca iti dharma.

Yening maka sami punika rered tur padem, sinah pawangunan Bali puniki nenten prasida mamargi antar. Napi malih ring pungkuran puniki wenten makudang-kudang wicara nibenin adat lan budaya druene, minakadi biuta sane kawetuang olih krama Desa ngenenin indik wewidangan, taler pamargi budaya asing sane tan nganutin tata titi sane wenten ring Bali. Punika wiakti banget ngawetuang pikobet, nanging punika marupa pakibeh jagat, iraga patut yatna-yatna ring kawentenan.

Pamekas iraga sareng sami mangkin mangda sida ngayunin malarapan antuk mulat sarira. Iraga sareng sami maka pawaris, sakadi mangkine kabaos putra bangsa, mangda yukti-yukti nyejerang rasa sutindih ring gumi, setata misinggihang dharmaning agama lan dharmaning Negara, sane gumanti kasungkemin tur kasinggihang ring jagate.

Ida Dane Sareng Sami

Ngajegang jagat Bali puniki, marupa kapatutan iraga sareng sami, maka pratisentana sane embas ring Bali, sane gumanti patut ngertiang warisan leluhur, mapiranti antuk mingsinggihang swadharmaning bela nagara. Yan saihang ring kawentenane riin, para leluhur matoh pati melanin gumi, riantukan kabanda antuk bromo corah, setata pangusak-asik, marikosa, mamati-mati wong tan padosa, sane dados meseh  dahat madurgama. Sane mangkin meseh asapunika tan wentenmalih. Nanging panglalah budaya dura negarane patut waspadain, mangda tan ngarubeda, riantukan puniki sida ngawetuang jagat Baline rusak. Adat budaya lan sastra agamane anggen panegulan nekekang kaajegan jagat Baline sane sampun kaloktah rauh ka jaba negara. Yan punika sida kaulati sareng sami, sinah jagat Bali landuh, gemah ripah loh jinawi, tata tentrem kerta raharja sakala-niskala, sane kabasos moksatam jagat hita ya ca iti dharma.

Ida dane sareng sami

Yan cuteteng titiang daging pidarta puniki,

1. Ajeg Bali inggih punika sahanan prawertine sane sida ngalanggengang indik tetamian para leluhure nguni,makadi adat, budaya lan agama.

2. Sane patut ngajegang jagat Bali puniki nentenja tios wantah iraga sareng sami pamekas nyane pratisentanan Baline tur sang sapa sira ugi sane urip kamertain antuk sari-sarining bhoga jagat baline, kamanggala antuk sang mawa rat,masarana antuk kayun lascarya tan paleteh.

3. Dasar ajeg Bali inggih punika Tri Hita Karana, sane kauripin antuk sastra agama Hindu.

4. Desa pakraman wantah marupa genah miara sahanan pangwerdian adat lan budaya Baline, pinaka sengker sane patut kaupapira kalestarian nyane.

Ida dane sarengsami sane kusumayang titiang

Wantah asapunika mungguing atur pidartan titiang, mogi-mogi wenten pikenoh ipun. Tios ring punika, titian tan lali ngalungsur agung rena pangampura, manawi wenten kirang-kirang ipun. Maka pamuput atur, titiang ngaturang parama santhi

Om Santih Santih Santih Om 

 (3)

“Nelebang Daging Sastra Anggen Ngaruruh Widya Guna”.

Om Swastyastu

Maka Murdhaning atur, pinih ajeng mantuka ring ida dane sareng sami, mustikanyane pisan Angga Juri sane kusumayang titiang. Sadurung titiang  matur, lugrayang titiang ngaturang rasa angayu bagia mantuka ring Ida Hyang Parama Kawi, riantukan sangkaning asung kertha wara nugrahan Ida, titiang prasida sadu ajeng ring ida dane sareng sami, gumantin ipun ngamiletin pamargi pacentokan Dharma Wacana, sane mapaiketan ring “Hari Pendidikan Nasional” warsane mangkin. Dumadak wekasan pamargi asapuniki sayan limbak kawentenannyane wastu sida pawangunan jagat Baline puniki mamargi antar.

Ida dane sareng sami mustikan nyane para pamilet sane wangiang titiang, mungguing darma wacana sane pacang atur uningayang titiang mamurda “Nelebang Daging Sastra Anggen Ngaruruh Widya Guna”.

Ida dane sareng sami

Nelebang daging sastra, punika merupa pabuat sane dahat mautama pisan. Riantukan pawangun jagat Baline kapungkur wekas, tan lempas ring swadharma sane kajiwa-pramanin antuk sastra agama Hindu. Puniki sida werdi tur limbak, majanten sangkaning kawentenan para janane, pamekas nyane para yoana utawi sisya sane makayunan nelebang sahananing daging sastra utawi cakepan-cakepan. Kabaosang sakadi asapunika, riantukan punika tan bina luir suluh sane nyuluhin awidya ring angga sarirane, mangda sida nyihnayang widya sastra, maka wiweka nimbangin iwang kalawan patute punika. Yan tan pasastra, nirdon urip ring jagate. Ring niti sastra kabaos sakadi asapuniki :

Heman I sang mamukti dumadi, tika tan hana guna,

Yowana, rupawan, kula, wisala, tika pada hana,

Den Ika tan pasastra, tanateja wadana makucem,

Lwir sekar ing sami abang murub, tan hana wangin ika.

Teges ipun :

Kaon pisan manresti dados manusa, sane asapunika tan maguna,

Anom, bagus, wangsa luih, siteng, punika sami kadruenang,

Yan tan madasar sastra ( kaduegan) romane ucem tan pacaya

Tan bina kadi bunga barak ngendih, nanging tan mabo miyik.

Iraga sareng sami, punika anggen pratiwimba, nampa kauripane mangda sida plapan, sampunang nega-nenga malajahin sastra, yan sakadi mamargine mangda sida rauh ka tanggu. Yan sampun ngamolihang kaweruhan, punika kaanggen pasupati ring sajeroning kauripan, anggen nyanggra pawangunan jagate, pamekas ring Bali,wastu sida ajeg, duaning punika marupa kapatutan iraga maprawerti, maka panrestian jadma Bali luih guna.

Masa muda adalah masa belajar , asapunika ketah mangkine, puniki masuksama iraga sareng sami para anom-anome, mangda teleb ngulati kaweruhan. Mapan urip masarira manusa tan bina luir patapan ambengane, ring sajeroning urip wimuda kadi mangkine, kabaos mengpeng tajep, mangan ngidepang widya sastra. Yan sampun wayah wastu sida dados kereb, maka pangayom jagat.

Iraga para yoana sareng sami, punika anggen pratiwimba, mangda sida plapan, sampunang obah malajah mauruk sastra,ngulati kaweruhan. Maka cutet, masekolah mangda ngantos molihang ijasah, tan bina sakadi panah pasupati paicvan Ida Bhatara Siwa, kaweruhane punika kaanggen nyanggra uripe wekasan, mangda urip tan nemu kasengsaran, maka pabuat jadma luih guna.

Jadma luih guna inggih punika jadma sane satata mingsinggihang pakerti leluhur, mapiranti antuk swadharmaning bela Negara.

Yan punika sampun sida katelebang, majanten sampun mupu tetujon pemerintahe. Duaning maka unteng tetujon pemerintahe  tan lian wantah mautsaha nincapang kaonengan para janane mangda seneng ngawacen. Yan sampun seneng ngawacen sinah sida nincapang kaweruhang, sane dahat mawiguna rikala ngempu uripe kapungkur wekas.

Ida dane sarengsami sane kusumayang titiang

Wantah asapunika mungguing atur dharma wacanan titiang, mogi-mogi wenten pikenoh ipun. Tios ring punika, titiang tan lali ngalungsur agung rena pangampura, manawi wenten kirang-kirang ipun. Maka pamuput atur, titian ngaturang parama santhi

Om Santih Santih Santih Om