PAPAOSAN LENGKARA

1 Pangertian Lengkara

            Lengkara punika marupa pupulan kruna, taler sering marupa kruna pinaka pasaur lengkara sadurungnyané. Pinaka dasar pupulan kruna utawi krunané punika kabaos lengkara inggih punika: (a) runtutan ucapan utawi tulisan sané madaging unteng pikayunan sané jangkep manut uger-uger tata basa; (b) runtutan ucapan sané madaging alunan suara (nada) ring pamuput madaging panees suara panguntat (intonasi final). Ring basa sané kasurat (basa tulis), lengkara ketahnyané kakawitin antuk aksara murda (huruf kapital) miwah ring panguntat madaging cecirén (tanda) cecek (titik), pitakén, miwah pisuruh (seru). Ngiring cingak conto kadi ring sor puniki.

Nyén ento?

Tiang.

Énggalin mai!

Siapé ané belina ibi suba mati.

Lengkara sané kabaos paripurna sakirangnyané madaging jejering lengkara (subjék) miwah linging lengkara (prédikat). Kawigunan (fungsi) lianan sakadi panandang (objék) miwah katerangan (keterangan) nénten ngwetuang lengkara punika jangkep.

2 Lengkara Nganutin Tetujon

            Nganutin tetujon bebaosan, lengkara kapérang dados tigang soroh inggih punika lengkara pamidarta, lengkara pitakén, miwah lengkara panguduh.

2.1 Lengkara Pamidarta

            Lengkara Pamidarta inggih punika lengkara sané nlatarang pariindikan. Panees lengkara ring untat ketahipun rata, sakadi:

Jani ada paméran di lapangan.

Ibi sanja umah I Darmané puun.

Dugas bomé macedar, tiang sedek maca buku.

Dugas odalané di Pura Désa Luh Nérti makamén songkét.

2.2 Lengkara Pitakén

            Lengkara Pitakén marupa lengkara sané tetujonipun nunas pasaur saking sang sané katakénin. Panees ring panguntat lengkara ketah ipun ngunggahang (intonasi tanya) miwah sering nganggén kruna pitakén, sakadi:

Ada paméran di lapangan?

Dija ada paméran?

Ada apa di kota Tabanan?

Sira sané rauh mriki?

2.3 Lengkara Panguduh

            Lengkara Panguduh inggih punika lengkara sané tetujonipun ngandikain anak tiosan mangda maparilaksana utawi ngambil pakaryan. Lengkara panguduh punika wénten panguduh sané alus miwah sané kasar, sakadi: 

1.     Gus alihang jebos salep ratun, kayang niki baktaang meriki nggih!

2.     Pak malih bénjang sawatara jam 19.00 Wita bukak kunci banjaré nggih!

3.     Pak madé yan sampun wénten madu geruh télpon titiang nggih!

4.     Luh, buin mani ngusaba di Désa ngerejang nah!

5.     Yan di rediténé sangkepin banjaré ka Désa nah!

6.     Jero mangku malih purnama sane jagi rauh niki tuntun titian ngelukat ka Tirta   

        Empul nggih!

7.     Buk nikayang sareng rabin ibuké, ring raihina buda puniki bajaré sangkep nggih!

8.     Adi yan mani semeng ka peken lebihin meli darang kopi, kerana tukang mani orin

        beli megarapan nah!

9.     Tu ngidiolas beliang bapa roko ka warung abongkos jani!

10.  De bagus nyan sanjané barengin meme ngalap bungan pacahé ka carik, cang aba

       ka peken mani nah!

11.  Jero ngidiolas tunasang titiang wangsupadanIda, yening janten jero benjang nangkil

       ka pura Lempuyang nggih!

12.  Man yan payu  kepasih, payu alihang bapa nyen yéh pasih wadahin jerégané nah!

13.  Alit-alité makesami ring rahina Purnamané ngangge pakaian adat ngeranjing  nggih!

14.  Adi ngidiolas nah, suratang  jep tulisan ené nganggo aksara bali nah!

15.  Mé yan ada timpal yangé teka ngalih buku, né duur mejané to baang  makejang

       nah!

 

      3 Lengkara Nganutin Wangun

            Nganutin wangunipun, lengkara kabinayang dados lengkara tunggal miwah lengkara masusun.

    3.1 Lengkara Tunggal

            Lengkara Tunggal, inggih punika lengkara sané polannyané asiki, sakirangnyané madaging jejering lengkara, linging lengkara, ring asapunapiné madaging panandang (objék) miwah katerangan, sakadi:

Mén Putu meli nasi

Ni Sari ngadep bunga di peken

Linuhé nguugang umah ibi sanja.

Semengan pesan pegawéné suba masuk ka kantor.

    3.2 Lengkara Masusun

Lengkara Masusun, inggih punika lengkara tunggal sané sampun kawrediang ngwangun susun anyar tur sakirangnyané madaging kalih lengkara tunggal. Lengkara masusun kabinayang malih dados tetiga inggih punika lengkara masusun pepadan, lengkara masusun matingkat, miwah lengkara masusun pepetan.

    3.2.1 Lengkara Masusun Pepadan

            Lengkara Masusun Pepadan inggih punika lengkara masusun sané lengkaranipun kantun sapadan utawi sederajat. Lengkara puniki ketah kagabungang antuk kruna napi, nanging, sakéwala, miwah sané lianan. Indayang cingak lengkara ring sor puniki.

Beli Wayan negak ditu, tiang dini.

Nyoman ngoyong driki napi milu ka umah Pan Danuné?

Adinné jemet, nanging belinné kiul.

Ia anak suba malajah, sakéwala nu masih belog.

      3.2.2 Lengkara Masusun Matingkat

            Lengkara Masusun Matingkat puniki kawangun antuk lengkara sané paiketannyané nénten sumaih. Silih sinunggil lengkarannyané kabaos inan lengkara (induk kalimat), lengkara sané lianan kabaos pranakan lengkara (anak kalimat), sakadi:

Nyoman Sokasti teka dugasé tiang sedek nulis surat di kamar.

Madé Cenik ngeling krana tusing menék kelas.

Ia malali mulih nuju bulan purnama.

Di subané ada anak nepukin makejang anaké sing bani malali kema.

    3.2.3 Lengkara Masusun Pepetan

            Lengkara Masusun Pepetan  inggih punika lengkara masusun sané ngutamayang mepetang wangun lengkara sané pateh, sakadi:

Cariké ento mara belina. Cariké ento jani suba gadéanga.

- Cariké ento mara belina, jani suba gadéanga.

I Sekar belianga nasi. I Guru tusing belianga nasi.

- I Sekar belianga nasi, I Guru tusing belianga.

Nyoman Ruja malali ka Jakarta. Nyoman Ruja malali ka Bandung, Nyoman Ruja malali ka Yogyakarta.

- Nyoman Ruja malali ka Jakarta, ka Bandung, lan ka Yogyakarta.

      4. Lengkara Nganutin Paindikan Jejering Lengkara

            Nganutin paindikan jejering lengkaranipun, lengkara-lengkara basa Baliné kabinayang dados lengkara lumaksana miwah lengkara linaksana.

  4.1 Lengkara Lumaksana

            Lengkara Lumaksana inggih punika lengkara sané jejering lengkarannyané nglaksanayang pakarya. Linging lengkarannyané ketah marupa kruna tiron mapangater anusuara, sakadi:

Beli Madé nusuk saté.

Mbok Putu ngaé rujak.

Adinné nulis surat ibi sanja di ampiké.

I juru boros manah kijangé ento.

   4.2 Lengkara Linaksana

Lengkara Linaksana, inggih punika lengkara sané jejering lengkarannyané keni paindikan. Linging lengkarannyané ketah marupa kruna tiron mapangater ka- miwah mapangiring –in, miwah –a, sakadi:

Saténé katusuk baan Beli Madé.

Tiang dukaina ring I Guru.

Bungané adepa tekén Luh Sari di Peken Badung.

Adinné maekin belinné.

Galengé tegakina tekén panakné.

 

Pustaka Acuan

Alwi, Hasan dkk. 1993. Tata Bahasa Baku Bahasa Indonesia. Jakarta: Departemen Pendidikan dan Kebudayaan.

Anom, I Gusti Ketut. 1983. Tata Bahasa Bali. Denpasar: Pemerintah Daerah Provinsi Daerah Tingkat I Bali

Bawa, I Wayan lan I Wayan Jendra. 1981. Struktur Bahasa Bali. Jakarta: Pusat Pembinaan dan Pengembangan Bahasa, Departemen Pendidikan dan Kebudayaan.

Cook S.J, Walter A. 1971. Introduction to Tagmemic Analysis. London-New York-Sydney-Toronto; Holt, Rinehart & Wiston.

Elson, Benjamin & Velma Pickett. 1969. An Introduction to Morphology and Syntax. Santa Ana, California: Summer Institute of Linguistics.

Ramlan, M. 1976. “Penyusunan Tata Bahasa Sruktural Bahasa Indonesia” (dalam Pedoman Penulisan Tata Bahasa Indonesia, ed. Yus Rusyana dan Samsuri). Jakarta: Pusat Pembinaan dan Pengembangan Bahasa Departemen Pendidikan dan Kebudayaan.

Sulaga, I Nyoman dkk. 1996. Tata Bahasa Baku Bahasa Bali. Denpasar: Pemerintah Provinsi Daerah Tingkat I Bali.

Tim Penyusun. 2006. Tata Basa Bali. Denpasar: Dinas Kebudayaan Provinsi Bali, Badan Pembina Bahasa, Aksara, dan Sastra Bali Provinsi Bali.

Tinggen, I Nengah. 1984. Tata Basa Bali Ringkes. Singaraja: Rhika.