BHAGAWAN DOMYA

                                      

Kacarita wénten Ida Sang Pandita, sané mapeséngan Bhagawan Domya, pasraman idané ring jagat Ayodhya. Ida madué sisia tigang diri sané mapeséngan: Sang Utamanyu, Sang Arunika, miwah Sang Wéda.

Makatetiga turéksain ida, napi ké murid-murid idané sayuakti bhakti ring guru? Tata caran idané nukréksain, Sang Arunika kandikayang makarya ring cariké. 

Sadurungé, Ida Dang Guru micayang kaweruhan indik kadharman. Duaning asapunika wacanan Ida Dang Guru, Sang Arunika ngemargiang sapari polah anak makarya ring sawah.

   Sang Arunika nandur pantun ring cariké, ri sampun lanus entik pantuné, wénten sabeh bales pisan sané kadulurin blabar ageng, mawinan telas embid pundukan cariké. Antuk ajerih idané, pantuné kalancah antuk toyané ageng, empelin ida toyané punika. Kacrita durung sué, empelané punika malih embid, malih empel ida malih embid.

    Salanturnyané anggan idané kanggén ngempel, nyelémpang ida ring toyané, kantos rahina wengi. Paindikan punika kaaksi olih Ida Bhagawan, raris ida ngandika: ”Cening Sang Arunika matangi idéwa, dahating pageh cening mayasa, kantos idéwa ngempel toyané antuk ragan ceningé. Jani bapa ngemaang cening adan, Sang Udalaka, sawiréh cening ngempelang ragan ceningé ring yehé. Malarapan bhaktin ceningé, cening lakar mangguhang kasukan sekala sidhi mantra, sandi ngucap”.

   Sané mangkin Sang Utamanyu sané turéksain ida, kaandikayang ngangonang lembu, raris Ida Sang Utamanyu ngangon.  Sajeroning ngangonang lembu, ida kluwén pisan. Punika mawinan ida ngagéndong utawi idih-idih, utamanipun ngidih ajengan anggén ida pangupajiwa ri kala ida ngangon. Sakéwanten pikolih idané nenten kaaturang ring Ida Dang Guru, indiké punika kawikanin olih Bhagawan Domya. Raris Ida Bagawan Domya mawacana: ”Cening Sang Utamanyu tata kraman anaké dadi sisia, yan jati bhakti ring guru, patut ngaturang nasi pikolihé ngidih-idih, kéto patutnyané. Pikolihé ngidih-idih sing patut ajengang cening”. Sang Utamanyu ngaturang sembah kadulurin nunas pangampura, duaning pamargin idané iwang.

    Bénjang semengané, mamargi ida ngangon, sinambi ngidih-idih. Pikolih punika aturang ida ring dag guru, sasampuné katurang, malih ida ngedih-idih. Kaksi olih Ida Dang Guru, mingkalihin ida ngidih-idih, raris tan kalugra, déning kabaos lobha. Malih ida ngangon santukan kluwéné raris ida nayub susu sareng godélé ring nyonyon lembuné. Katakénin olih Ida Dang Guru napi sané kanggén sangu ri kala ngangon.

   Matur Sang Utamanyu, ”Titiang masusu ring nyonyon lembuné”. Ngandika Ida Dang Guru: ”Cening Sang Utamaniyu sing patut laksanan ceningé buka kéto, sawiréh nyuang druén nabé ento adané, awinan ida wusan nginum susu”.

   Wénten didih medal saking monmon godélé punika sané dilat ida pinaka sangun ida ngangon. Malih katakénin olih dang nabé. Sang Utamanyu nguningayang Ida nilat didih susu sané ulung ring tanahé.

   Ngandika Ida Peranda Nabé, “Ih cening Sang Utamanyu tusing patut ento ajengang cening, pianak lembuné nawang cening seduk, melarapan ban kawelasan iané tekén cening, ia ngutahang pikolihné manyonyo. Tusing dadi cening nyuwangin mertan ia i godél, makelo-kelo bisa berag godélé”.

   Sapunika wacanan Ida Dang Guru. Sang Utamanyu ngaturang sembah tur nunas pangampura. Bénjang pasemengan malih ida ngangon, nénten ngajengang. Antuk kluwén idané, raris ida ngajengang getah daun madori, santukan getah daun madori punika panes pisan, nyupsup rauh ring panyingakan Ida Sang Utamanyu mawastu Ida buta, paling Ida ngruruh lembuné, wénten sémér, irika ida runtuh macelempung.

   Sasampuné soré mawali lembuné ka badannyané nénten wénten ngatehang. Duaning nénten kacingak Sang Utamanyu, awanan paling Ida Peranda Nabé ngruruh sisiané. Bénjang pasemengan karerehin olih Ida Dang Guru. Kapanggihin ida ring tengah séméré punika. Raris katakénin sané mawinan ida runtuh ring séméré. Sang Utamanyu nguningang ragané buta sangkaning ngajengang getah madori.

   Kapariangenan Ida Paranda Guru ngaksi sisianida ngemasin buta sangkaning dahat bhakti ring sang guru. Raris kaicén Sang Utamanyu mantra Aswinodéwa, pinaka tamba mangdané wusan ida buta, malih mawali panyingakan idané waras kadi mula nénten wénten cacad. Sangkaning kateleban Sang Utamanyu dados sisia, ida polih panugrahan kawisésan, kaweruhan olih Ida Bhagawan Domya.

   Mangkin Ida Sang Wéda sané katuréksain. Sang Wéda kanikain mangda jenek ring pawaregan, ngaturang rayunan Ida Dang Guru nyabran rahina. Malarapan antuk bhaktin Ida Sang Wéda ring Dang Guru kadulurin panes tis sarahina pakaryan ida nyodayang rayunan majeng ring Ida Dang Guru saha setata ngiring sakancan pituduh sang meraga guru. Raris ida kaicen panugrahan pangeweruh miwah wéda mantra.

   Sasampun Sang Wéda molihang panugrahan, raris ida mantuk ka patapan idané. Ida uning pisan mangkin ring pakéwuhé ngamolihang kaweruhan utawi kawikanan mawinan ida makayun-kayun ring angga. Sapuniki daging pakayunan ida, yan idéwék ngelah sisia, buin manian lakar baang ia Sang Hyang Mantra, lakar sing idihin sesari ané patut katur ring dang guru, buina lakar tusing turéksain, sakadi Ida Bhagawan Domya nuréksain déwéké. Mungguing asapunika pakayunan Ida Sang Wéda.      

            Kaketus saking Adi Parwa

Antuk Dinas Pendidikan Provinsi Bali